N MOHANANTE KATHAKAL | എന്‍ മോഹനന്റെ കഥകള്‍

പ്രണയവും കാല്പനികതയുമാണ് എൻ. മോഹനന്റെ രചനാലോകത്തെ കഥനത്തിന്റെ മുഖ്യപാത. സൗഹൃദത്തിന്റെയും രാഷ്ട്രീയത്തിന്റെയും കുടുംബബന്ധങ്ങളുടെയും ചില ഉപരഥ്യകളുമുണ്ട്. റബ്ബറും കുരുമുളകും തുളസിയും നന്ത്യാർവട്ടവും പള്ളിയും അമ്പലവും ഗ്രാമവും നഗരവും പഴമയും പുതുമയും ബ്യൂറോക്രസിയും രാഷ്ട്രീയവും പത്ര പ്രവർത്തനവും വൈദ്യവൃത്തിയും അധ്യാപനവും സാഹിത്യവും പോലുള്ള സാംസ്കാരികവും പ്രാദേശികവും തൊഴിൽപരവുമായ പലമകളാൽ സമ്പന്നമായ ഇരുപതാം നൂറ്റാണ്ടിന്റെ രണ്ടാം പകുതിയിലെ കേരളീയജീവിതത്തിന്റെ പരിച്ഛേദംപോലെ ഈ കഥകൾ.

എന്‍.മോഹനന്റെ കഥകളുടെ സമ്പൂര്‍ണ സമാഹാരം.
കഥയുടെയും കവിതയുടെയും അതിര്‍വരമ്പുകള്‍ കാണാനാവാത്ത വിധം ഭാഷ പുറത്തിറങ്ങുന്ന ശൈലിയാണ് മോഹനന്റേത് അനുഭവ സത്യങ്ങളെ കഥകളാക്കി പരിവര്‍ത്തിക്കുന്ന രസതന്ത്രത്തില്‍ നുണയ്ക്കൊരു പങ്കുണ്ട്. നുണ എത്രത്തോളമെന്ന പാകവിജ്ഞാനം ഈ കഥകളുടെ പിറവിക്കു പിന്നിലുണ്ട്. മോഹനന്റെ ഏതു കഥയിലും സ്നേഹജ്ജ്വരം പൂണ്ടുപാടുന്ന ഒരു പക്ഷിയുണ്ട്. അത് സ്നേഹിക്കുകയും ദുഃഖിക്കുകയും ചെയ്യുന്ന മനുഷ്യാത്മാവുതന്നെയാണ് ഏതുകാലത്തെയും ഏതു ദേശത്തെയും..